Бино бар хабарҳои расида дар шаҳри Дортмунди Олмон як масҷиди панҷвақтае ташкил гардидааст, ки созмондиҳандагони он тоҷикони муқими ин кишвар мебошанд. Ҳамчунин гуфта мешавад, ки тоҷикон дар Олмон маркази фарҳангие низ боз намудаанд, ки “Нур” ном дорад.
Раҳбари ҷамъияти тоҷикон Абдуқодир Аминӣ гуфтааст, ки “Нур” ба қарибӣ оғоз ба фаъолият намуд ва як созмони комилан фарҳангӣ ба шумор меравад.
Таъкид мегардад, ки дар чаҳорчӯби оинномаи ҷамъияти мазкур тоҷикон чорабиниҳои фарҳангӣ, ки хоси ин миллат аст, баргузор мекунанд ва ба ин роҳ маданияти миллии худро ба аҳли Олмон намоиш хоҳанд дод. Барои аз фарҳанги тоҷикона бархурдор гардидани фарзандонашон ва худшиносии миллии онҳо дар оянда ин ҷамъият нақши муҳим хоҳад бозид.
Абдуқодир Аминӣ афзудааст, ки масҷиди панҷвақтае бо номи “Тақво” низ кушодаанд ва тоҷикони муқими Олмон намози рӯзи ҷумъаро дар он адо менамоянд. Масҷид ва ҷамъияти фарҳангӣ имкон хоҳад дод, ки тоҷикон гирдиҳам биёянд ва аз зиндагиву кори худ дур аз ватан бохабар гарданд. Гуфта мешавад масҷиди “Тақво” дар Аврупо аввалин масҷидест, ки аз ҷониби тоҷикон созмон ёфтааст.