Хоҷа Шамсиддин Муҳаммади Ҳофизи Шерозӣ:
ҶАВОБИЯ
Агар он турки Шерозӣ ба даст орад дили моро,
Ба холи ҳиндуяш бахшам Самарқанду Бухороро.
ҲОФИЗИ ШЕРОЗӢ
ДАР ПОСУХ СОИБ ЧУНИН МЕГУЯД:
Ҳар он кас чиз мебахшад, ба ҷони хеш мебахшад,
На чун Ҳофиз мебахшад Самарқанду Бухороро.
Агар он турки Шерозӣ ба даст орад дили моро,
Ба холи ҳиндуяш бахшам сару дасту тану поро..
ШАҲРИЁР БА СОИБ ИН ПОСУХРО МЕФАРМОЯД:
Ҳар он кас чиз мебахшад, ба сони мард мебахшад,
На чун Соиб мебахшад сару дасту тану поро.
Сару дасту тану поро ба хоки гур мебахшанд,
На бар он турки Шерозӣ, ки ҷумла бурда дилҳоро.
Агар он турки Шерозӣ ба даст орад дили моро,
Ба холи ҳиндуяш бахшам, тамоми руху аҷзоро.
НАФАРЕ ИН ТАРЗРО МАНЗУР МЕКУНАД:
Ҳар он кас чиз мебахшад, ба ҷамъи хеш мебахшад,
Яке шахру яке ҷисму яке ҳам руҳу аҷзҳоро,
Касе чун ман надорад ҳеҷ дар дунёву дар уқбо
Нагуяд ҳарфи муфту чун надорад тоби иҷроро...
РАЪНОИ ЗОИРДУХТ ҶАВОБ МЕДИҲАД:
Агар ки турки Шерозӣ рабуда ҷумла дилҳоро
Надидастӣ дареғо, ту мани Раънои раъноро.
Агар майле ту ҳам дорӣ назар бар ҷониби мо кун,
Фаромӯш созӣ баъди ин дилу ақлу сару поро.
Шакар ояд бурун гоҳе такаллум аз забони ман,
Ғубори поям орад ёд боди анбаросоро.
Дигар ҳарфи накӯ Ҳофиз, магӯ, бар турки Шерозӣ,
Бигир аз турки Шерозӣ Самарқанду Бухороро.
Чаро дода сару дасту тану по Соиби Табрез,
Парешон мекунад аз ҳоли зораш хотири моро.
Худоё, ошиқони даҳрро ҳушу хирад бахшой,
Мисоли бонуи тоҷик кӣ дида духти доноро?
Ба холи турки яғмоӣ чаро мардони форсигӯ
Бубахшида сару пову тану руҳ, ҷумла аҷзоро?
Шудам ҳайрони Шаҳриёру холи ҳиндуву Соиб,
Чӣ ҳикмат будаву бошад, ки ёбад ин муамморо?..
Зи тангии нафас аз ҷоми Хайём ҷуръа нушидам,
Садо омад, таҳаммул кун, ЗАНИ ТОҶИК мадороро!!
ЛОИҚ ШЕРАЛӢ ГУФТААСТ:
Ба ҳусни туркдухтар, ки саропо макру исён аст,
Намеарзад, ки бахшоям ғубори нохуни поро.
Агар Ҳофиз ту медиди ҷамоли духтари тоҷик,
Барояш ҳадя мекарди тамоми рӯи дунёро.
Ҷамоли духтари тоҷик яқинан, ки Худодод аст,
Ва ман баҳраш бубахшоям ҳама гулҳои раъноро.
Агар бо чашми камбинаш ба суям як назар орад,
Фаромуш мекунам он лаҳза гулгашти мусаллоро.
Ало эй хоҷаи Ҳофиз гумонам, ки пушаймонӣ,
Аз оне, ки бубахшидӣ Самарқанду Бухороро.
НОАЁНӢ:
Агар он турки Шерозӣ ба даст орад дили моро,
Намебахшам, намебахшам наметвонам ман ин корро.
Худо худ оқилу доно Раҳим ҳасту Карим ҳасто,
Чиро Ҳофиз мехоҳад, чиро Соиб, чиро Раъно.
Дареғо ту надидӣ бачаи шуҷоъи Хатлонро,
Барояш мебахшидӣ тамоми мулки дунёро.
Агар ту Турки зебоӣ, парие зери дарёӣ,
Зани точик меарзад ба кони ганҷу дороӣ.
"Зи тангии нафас аз ҷоми Хайём ҷуръа менӯшам"
Ки ман ошиқ гаштам бар ту эй бонуи Хатлонӣ.
УСТОД ИСФАНДИЁРИ НАЗАР:
Агар он турки шерозӣ, Худоё, дил диҳад моро,
Ба поси ин саховат мебарам аз ёд дунёро!
Чи мебахшам, ки бахшудан ба аз худ камтаре бошад?
Куҷо камтар шуморам аз худам он ёри зеборо?
Сухан аз бахшишу бахшандагӣ дар ҳадди чун ман нест,
Ки бошад ин сифат танҳо Худованди тавоноро.
Ман аз доду деҳиш мегӯяму он турки симинбар,
Зи ман дил мебарад он сон, ки ҷаддаш хони яғморо.
Дили ман бурда бо нозе, ки дилбар дил барад умре,
Ва ҳам шояд диҳад дил бедили гардида шайдоро.
Ҳама дунёву мо фиҳо намеарзад ба оғӯше,
Ки бар бозори хубон оварам ин куҳнаколоро.
Дар ин доду деҳиш дил додану дил бурданам ин аст,
Ки бо он ёри Шерозӣ канори ҳам ниҳем поро.
НОАЁНӢ:
Ба холи ҳиндуи туркон.
Намеарзад ними ҷав хам.
Чаро ту додаи Ҳофиз
Самарканду Бухороро.
Миёни баста мегирям.
Ба ҳолат эй Самаркандам.
Ки туркон шаҳди гул чинанду.
Тоҷик санги саҳроро!
Розия Бадал гуфтаст :
Ҷавоб гӯ :Розия ҳало ба он нӯҳ шоири боло.,
Ба таври худ тақдим кард ба як хол қути дунёро .
х х х
Чаро ? Ҳофиз и мо ин ҷо ба як турк духтари сиёҳ ..
Яку якбора тақдим кард Самарқанду Бухоро ро ?
х х х
Чаро ? Соҳиби Табрезӣ , ба як ҳиндуи таннозӣ
Яку якбора мебахшад ,сару дасту тану поро